Di wuol wol a stiej,
Ebri man ah uman onggl a-plie.
Deh ab wen deh fi lef ah wen komiin,
Ah wan man ina fiim taim plie nof paat,
Ih akdem a sebm iej. Fos di biebi,
A-mumu ah chuop ina nana an.
Den, di nenge skuul-pitni wid ih bag
Ah shaini maanin fies, a-kraal laik sniel
No waah go a skuul. Ah den di miet,
A-sai laka foernis, wid sapsi chuun
Mek aafa mieti yaibrou. Den, a suoja,
Ful a kos uot, biedop laka layan,
Jelos fiim hana, bringgl, ah baps a ropshan,
A-luk di mini-mini faawad
Aal ina di kianan mout. Ah den, di jostis,
Wid bofro beli, fulop a frai chikin,
Wid yaidem raigin, ah bied shiepop shaap,
Fula waiz mout, ah di lietis kuot kies,
Ah so ih du fiim paat. Di six iej shif
Go a di jres no bakfut papishuo
Wid petikl pah nuoz ah pouch pah said,
Yong-diez kluoz, tek kiera, no fit agen
Far ih jraadong, an ih big-big man vais,
A-ton agen ina pikni chrebl, paip
Ah wisl ina ih soun. Laas siin nou
Fi hen dis krebe apm ischri,
A sekan pitni-iej ah figetfulnis,
Widoutn tiit, no yai, no ties, no notn.